Зах зээл хөгжиж байна, журмаа өөрчлөх хэрэгтэй

pic

"Манай 20 мянган хувьцаа эзэмшигчийн эрх ашиг энд зөрчигдөж байна"

Монголын хамгийн олон хувьцаа эзэмшигчтэй компанийн нэг нь “Ард санхүүгийн нэгдэл”. Тус компанийн гүйцэтгэх захирал Ч.Ганхуяг өнөөдөр хэвлэлийн бага хурал зарлаж, “Булган Ундарга” компанитай холбоотой асуудлаар сэтгүүлчдэд мэдээлэл өглөө.

Тэрбээр Санхүүгийн зохицуулах хорооны “Булган Ундарга” компанитай холбоотой гаргасан шийдвэр “Ард Санхүүгийн Нэгдэл”-ийн 20 мянган хувьцаа эзэмшигчийн эрх ашгийг зөрчиж байна гэв. Тодруулбал, “Ард Санхүүгийн Нэгдэл” ХК нь 2020 оны арванхоёрдугаар сард Монголын хөрөнгийн биржид бүртгэлтэй “Булган Ундарга” ХК-д хөрөнгө оруулалт хийж, менежментийг нь удирддаг “КриптоҮндэстэн” ХХК-ийн эзэмшил дэх биткойнуудаа шилжүүлсэн байна. Улмаар зах зээлийн үнэлгээ нь бага “Булган Ундарга” ХК-ийн хувьцааны ханшийг тодорхой хэмжээнд нэмэгдүүлж, хөрөнгө оруулагчид болох “КриптоҮндэстэн” ХХК-ийн хувьцаа эзэмшигчдэд тус компанийн хувьцааг шилжүүлэх гэсэн боловч үүнийг нь Монголын хөрөнгийн бирж болон Санхүүгийн зохицуулах хорооноос “Булган Ундарга” ХК-ийн хувьцааны ханшийг  үндэслэлгүйгээр өсгөхийг оролдсон буюу манипуляци хийж байна гэж үзэн, Монголын хөрөнгийн бирж дэх “Булган Ундарга” ХК-ийн хувьцааны арилжааг зогсоосон байна.

Монголын хөрөнгийн зах зээлд одоо үйлчилж буй журмаар нэг компанийн хувьцааны ханшийн нэг өдрийн өсөлтийн дээд хязгаарыг 15 хувиар тогтоодог байна. Энэ нь хувьцаа эзэмшигчдийн эрх ашгийг зөрчсөн цөөнгүй дүрэм журмын нэг хэмээн Ч.Ганхуяг захирал үзэж байна.  Мөн нэг өдрийн өсөлтийг 15 хувиар тогтоож, ашгийг битгий хязгаарлаач гэж хөрөнгийн зах зээлийг зохицуулж буй байгууллагуудад хандан хэлж байна. Би Монголын санхүүгийн салбарт 30 гаруй жилийн хугацаанд зүтгэж байна. Надад ганц ч хүн хувьцаагаа хулхидуулчихлаа гэж орж байгаагүй гэдгээ ч тэрбээр онцолсон.

“Бид 10, 20-хон сая төгрөгийн үнэлгээтэй байсан компанид өөрсдийн дөрөв, таван тэрбум төгрөгийн хөрөнгийг шилжүүлж байгаа учраас хувьцааных нь үнийг дээш нь өгсөөд, улмаар хөрөнгө оруулагчид болох “КриптоҮндэстэн” компанийн хувьцаа эзэмшигчдэд шилжүүлэх гэсэн. Гэтэл үүнийг зохицуулах байгууллагууд манипуляци гэж үзэж буйтай санал нийлэхгүй байна. Хувьцааг нь худалдаж авна гэдгээ ил тод зарлаж байгаад, худалдаж авдаг манипуляци гэж хаана ч байхгүй. Энэ арилжаанаас хохирсон хүн байхгүй. Хувьцааны үнэ өсөхөөр хэн хохирно гэж. Нэг компанийн хувьцаагаар нөгөө компанийг худалдан авч байна” хэмээн “Ард Санхүүгийн Нэгдэл” ХК-ийн гүйцэтгэх захирал Ч.Ганхуяг хэлсэн юм.

Монголын хөрөнгийн биржид бүртгэлтэй “Жинст Увс” ХК-ийн хувьцааг худалдан авч, “Хөрөнгө оруулагч Үндэстэн” компаниатай урвуу нэгдэл хийх замаар “Ард Санхүү Нэгдэл” ХК-ийг нээлттэй компани болгосон. Дашрамд дурдахад, “Ард Санхүүгийн Нэгдэл” ХК-ийн зах зээлийн үнэлгээ 2020 оны есдүгээр сарын байдлаар 30 тэрбум төгрөгтэй тэнцэж байсан бол энэ долоо хоногийн байдлаар 100 тэрбум төгрөг рүү дөхөж байна.

https://gogo.mn/r/k5j3l

« Буцах