Ард Санхүүгийн Нэгдлээс Хөрөнгө Оруулагч Үндэстэн хөдөлгөөнийг өрнүүлээд таван жил болж байна. Таван жилийн өмнө Ард Менежмент ҮЦК ХХК-ийг үүсгэн байгуулж, Анхны Хөрөнгө Оруулалтын Санг бий болгох ажлаа эхлүүлж байсан бол 2020 оны наймдугаар сарын 24-нөөс Үндэсний Хувьчлалын Сан нэртэй Монголын Анхны Хамтын Хөрөнгө Оруулалтын Сангийн үйл ажиллагааг эхлүүлж, Монголын Хөрөнгийн Бирж дээр амжилттай ажиллаж байна. Тэд олон нийтээс татан төвлөрүүлэх 4 тэрбум 750 сая төгрөгийн төлөвлөгөөгөө 17 хувиар давуулан биелүүлсэн бол хоёрдогч зах зээлийн арилжаа эхэлснээр нэгж эрхийн арилжаа идэвхтэй хийгдэж, үнийн хувьд одоогоор 14 хувиар өссөн үзүүлэлттэй байна.

Хүмүүс урьд нь хөрөнгийн зах зээлээс хувьцаа авч, үнэ нь өсвөл хожиж, унавал алдаад, компаниас ногдол ашиг аваад явдаг байсан бол одоо мэргэжлийн удирдлагын компани болох Ард Менежмент ҮЦК хөрөнгө оруулагчийн өмнөөс шийдвэр гаргаж, МХБ дээр хамгийн ашигтай байгаа хувьцааг хямд байхад нь авч, өндөр үнэтэй үед нь зарах байдлаар ашгийн өгөөжийг хамгийн өндөр түвшинд хүргэж ажиллах юм. Тухайлбал, их мөнгөөр хувьчлалд оролцох боломж иргэдэд тэр бүр байдаггүй, харин олуулаа хөрөнгөө нэгтгэж, хамтдаа төрийн өмчит компаниудын хувьчлалд оролцсоноор Монгол хүн - Улсынхаа баялгийн жинхэнэ эзэн болох боломж нээгдэж байна. Хувьчлал гэдэг нь улсын хөрөнгийг ард иргэдэд эзэмшүүлж байгаа нэг арга бөгөөд хувьчлалаас хүмүүс урт хугацаанд өндөр өгөөж хүртэх боломжтой.

Монголчууд хөрөнгөө нийлүүлснээр гадаадын хөрөнгийн бирж дээр зарагдаж байгаа Оюутолгой, Энержи Ресурс тэргүүтэй компаниудынхаа хувьцааг мөн өөрсдөө авч, баялагтаа эзэн болох боломжтой.

Америкийн телевизийн “Аппрентис” реалити шоуг продюсер Марк Бернет анх санаачлан хэрэгжүүлж, 2004 оны нэгдүгээр сараас эхний дугаар нь цацагдаж эхэлжээ. Сонирхуулахад, дэлхийн тэрбумтан Дональд Трамп тус шоуны шүүгчээр ажилласан нь түүний талаарх иргэдийн үнэлэмжийг дээшлүүлж, АНУ-ын Ерөнхийлөгчөөр сонгогдоход нь нөлөөлсөн гэж үздэг.

Тэгвэл Монгол ТВ-ээс явуулж буй “Аппрентис Монгол” шоуны анхны шүүгчээр Ард Санхүүгийн Нэгдлийн Гүйцэтгэх захирал Ч.Ганхуяг ажиллаж байна. Тэрбээр шоунд оролцох хүсэлтээ ирүүлсэн, өндөр боловсролтой, өөртөө итгэлтэй 400 гаруй залуучуудаас 14-ийг нь шигшин, оролцогчдыг хоёр баг болгон өрсөлдүүлж, старт-ап бизнесийн шинэ санаа, удирдах чадвар, зохион байгуулалт, багийн ажиллагаа, бүтээгдэхүүн борлуулалт, ажлын үр дүнгээр нь ялагч багийг тодруулж байна. Шоу нэвтрүүлгийн дугаар бүрийн төгсгөлд ялагдсан багаас хамгийн идэвх зүтгэлгүй, эсвэл тухайн даалгавар дээр хамгийн том алдаа гаргасан нэг гишүүнийг тэмцээнээс хасдаг. “Аппрентис Монгол” шоуны эцсийн ялагчийг 200 сая төгрөгийн цалинтай, Ард Санхүүгийн Нэгдлийн охин компанийн Гүйцэтгэх захирлын албан тушаал хүлээж байгаа юм.

Үзэгчид бүтэн гурван цагийн турш цэнхэр дэлгэцийнхээ өмнө уягдаж буйн гол шалтгааныг Ч.Ганхуяг захирлын дүгнэлт, шударга байдал, хэлж буй үг нэг бүрийнх нь үнэ цэнтэй холбон ойлгож болохоор байна. Тэрбээр Монголын том том бизнесмэнүүд, Гүйцэтгэх захирлуудын ил хэлдэггүй зүйлсийг зоригтойгоор, шулуун шударгаар хэлж, бизнес яаж хийдгийг, бизнес хийх нь өөрөө ямар эрсдэл дагуулдгийг, удирдагч хүний ажил хэчнээн амаргүй, хариуцлага өндөртэй болохыг оролцогчдод төдийгүй үзэгчдэд ойлгуулж буйгаараа үнэ цэнтэй юм.

Ч.Ганхуяг 2015 онд Хөрөнгө Оруулагч Үндэстэн хөдөлгөөнийг эхлүүлсэн нь ард олны дунд хүчээ авч, 2016 онд Хөрөнгө Оруулагч Үндэстэн ХК-ийг үүсгэн байгуулж, түүний эхлүүлсэн энэ санаачилга нийгмийн хөдөлгөөн болж өргөжсөн юм. Хөрөнгө Оруулагч Үндэстэн нь банк санхүүгийн байгууллагад хувь иргэд зөвхөн үйлчлүүлэгч бус өсөлт, ашгаас нь хүртдэг хувь эзэмшигчид болох чин эрмэлзлийн дор байгуулагдсан цоо шинэ компани юм.

Хөрөнгө Оруулагч Үндэстэн хаалттай хувьцаат компани нь Санхүүгийн Зохицуулах Хорооны 2017 оны 11 дүгээр сарын 24-ний хурлын тогтоолоор Жинст Увс нээлттэй хувьцаат компанитай нэгдэж Монголын Хөрөнгийн Бирж дээр анх удаа хувьцаагаа чөлөөтэй арилжаалах болов. Хөрөнгийн зах зээлийн түүхэнд ингэж анх удаа урвуу нэгдэл буюу Reverse Takeover хэлцлийг амжилттай гүйцэтгэж, тус хоёр компанийн нэгдэл 1 тэрбум 600 сая төгрөгийг бүрдүүлсэн нь Монголын хөрөнгийн зах зээлд эдийн засгийн өгөөж, баялгийг зохистой хуваарилахад чухал үр нөлөөг үзүүлжээ.  
Ийнхүү хувьцаа эзэмшигчид Хөрөнгийн бирж дээр гарснаар хөрвөх чадвартай болж, хоорондоо хувьцаагаа арилжих боломж бүрдсэн төдийгүй Хөрөнгө Оруулагч Үндэстэн нээлттэй компани болж, жирийн иргэд санхүүгийн нэгдэл компанийг эзэмших боломж бүрдсэн юм.  
Хөрөнгө Оруулагч Үндэстэн нь Ард Санхүүгийн Нэгдэлтэй хамтран банк санхүүгийн салбарыг цахим хувьсгалд хамруулах зорилгын хүрээнд хувьцаа эзэмшигчдээсээ татан төвлөрүүлсэн хөрөнгөөр Засгийн газрын үнэт цаас, Монгол Шуудан, Ард Санхүүгийн Нэгдэл, Ард Даатгал компаниудын хувьцааг худалдан авсан бөгөөд нэгж хувьцааны дотоод үнэлгээ нь тогтмол өссөн үр дүнтэй байна. Өнөөгийн байдлаар, Хөрөнгө Оруулагч Үндэстэн хөдөлгөөнд 10 мянга гаруй иргэн нэгдээд байна.

Улаанбаатар хот хурдацтайгаар өөрчлөгдөн, өргөжин тэлж байгаа ч, үүний сацуу дэлхийн томоохон хотуудын нэгэн адил нийгэм, эдийн засгийн олон асуудалтай нүүр тулж байна. Эдгээр асуудлыг шийдэхийн тулд 2015 онд Ч.Ганхуяг хэсэг бизнес эрхлэгчид болон тухайн үеийн Нийслэлийн Засаг дарга бөгөөд Улаанбаатар хотын Захирагч Э.Бат-Үүлийн хамт Улаанбаатар хотын Худалдааны Танхим (УБХТ)-ыг санаачилж, нийслэлд бизнесийн үйл ажиллагаа явуулдаг 70 гаруй томоохон компани нэгдсэнээр энэхүү ТББ-ыг үүсгэн байгуулсан юм. Тус танхим нь нийслэлийн хөгжлийг дэмжих, бизнес эрхлэгчдийн эрх ашгийг хамгаалах, хөгжлийн бодлого боловсруулах талаар гишүүдийнхээ дуу хоолойг нийслэлийн болон төр засгийн удирдлагуудад хүргэж хамтран ажиллах зорилготой.   

Ард Санхүүгийн Нэгдлийн Гүйцэтгэх захирал Ч.Ганхуяг 2019 онд УБХТ-ын Ерөнхийлөгчөөр сонгогдсон. Тэрбээр гадаад дотоодын хөрөнгө оруулагчдын итгэлийг нэмэгдүүлэх зорилгоор олон улсад хүлээн зөвшөөрөгдсөн бие даасан арбитрыг Танхимынхаа дэргэд байгуулан ажиллаж байна.

Дэлхийн Эдийн Засгийн Чуулганыг үүсгэн байгуулагч, профессор Клаус Шваб 30-аас доош насны залуучуудад орон нутаг, бүс нутаг, дэлхийд тулгамдаж буй асуудлуудыг шийдвэрлэхэд идэвхтэй үүрэг гүйцэтгэх, хамтран ажиллах боломжийг олгох зорилгоор 2011 онд Глобал Шейперс Нийгэмлэгийг үүсгэн байгуулав. Өнөөдөр Глобал Шейперс Нийгэмлэг нь 13,000 гаруй гишүүнтэйгээр дэлхийн 150 оронд 430 салбар төвөөр дамжуулан үйл ажиллагаа явуулж байна. Шейперүүд мэдлэг, боловсрол, орлого, арьсны өнгөөр ялгаатай боловч өөрчлөлт хийх хүсэл эрмэлзлээрээ нэгддэг. Тэд гамшиг, ядуурал, уур амьсгалын өөрчлөлттэй тэмцэх, хүртээмжтэй нийгмийг бий болгох зэрэг өргөн цар хүрээтэй төслүүдийг өөр өөрийн амьдарч буй хотод зохион байгуулдаг. Дэлхийн Эдийн Засгийн Чуулганаас Глобал Шейперс Нийгэмлэгт ажилчдын цаг хугацаа, технологийн хэрэгсэл, гишүүнчлэлийн сүлжээтэйгээ хамтран ажиллах боломж зэрэг үйл ажиллагааны болон санхүүгийн дэмжлэг үзүүлдэг. Залуучууд ирээдүйгээ тодорхойлоход идэвхтэй үүрэг гүйцэтгэх ийм боломж урьд нь хэзээ ч гарч байгаагүй билээ.

Глобал Шейперс Нийгэмлэгийн салбар төвүүдийн удирдагчид буюу кураторууд бүс нутгийн хамтын ажиллагааг дэмжих, бусад төвүүдтэй хүчээ нэгтгэх замаар дэлхийн хэмжээнд нөлөөлөх боломжийг эрэлхийлж, бусадтайгаа туршлагаа хуваалцах зорилгоор Шейперс арга хэмжээнүүдийг зохион байгуулдаг. Ч.Ганхуяг Улаанбаатар Глобал Шейперс Нийгэмлэгийг үүсгэн байгуулж, 2011 – 2012 онд анхны куратороор ажилласан бөгөөд насан туршдаа үүсгэн байгуулагч куратороор нэрлэгдэх аж.

ХасБанкны 10 жилийн ойн хүрээнд ард иргэд, залуу гэр бүл, нийгмийн сайн сайхны төлөө олон ажил хэрэгжүүлсний нэг нь “Монгол Мөрөөдөл” төсөл юм. Төслийн үүсгэн байгуулагч нь ХасБанкны Гүйцэтгэх Захирал Ч.Ганхуяг байлаа. "Монгол Мөрөөдөл" төслийг нийслэлийн Засаг даргын Тамгын газар, ХасБанк, TV5 телевиз хамтран хэрэгжүүлсэн бөгөөд төслийн нэг хэсэг болох “Ургах Наран” цогцолбор хороолол 2008 оноос нийслэлийн зүүн захад сүндэрлэн боссон юм.

Тухайн үед ХасБанк, ТВ5 телевиз хамтран "Монгол Мөрөөдөл" реалити шоу зохион байгуулж, нэвтрүүлгийн ялагч хосод "Ургах Наран" хорооллын эхний ээлжинд ашиглалтад орсон 114 айлын орон сууцнаас хоёр өрөө байр бэлэглэж, нэвтрүүлэгт оролцсон бусад зургаан залуу гэр бүлийг ХасБанкны онцгой хөнгөлөлттэй орон сууцны зээлд хамруулсан билээ. Залуу гэр бүлүүдэд эрүүл агаар, тав тухтай орчинд аж төрөх боломжийг олгож, хамгийн бага урьдчилгаа төлбөртэй, хамгийн урт хугацааны ХасБанкны орон сууцны зээлийг олгосон нь “Монгол Мөрөөдөл” төслийн давуу тал байсан юм.

Тэд реалити шоугаар дамжуулан орон сууц барихад ямар хүч хөдөлмөр ордог, байр худалдан авахад санхүүгийн эх үүсвэрээ хэрхэн олох, банкны зээл, хүү ямар байдаг талаар үзэгчдэд таниулж, хүмүүсийн оюун санаанд хөрөнгө оруулалт хийсэн гэдгээрээ онцлогтой.

Монголын Эдийн Засгийн Чуулган нь бизнес, улс төр, эрдэмтэн судлаачид болон иргэний нийгмийн төлөөллийн дунд нээлттэй хэлэлцүүлэг өрнүүлж, Монгол Улсын хөгжлийг хурдасгах асуудлаар нийтлэг ойлголцлыг бий болгох эрхэм зорилготой улс төрөөс хараат бус, төрийн бус, олон нийтийн байгууллага юм. Жил бүрийн чуулга уулзалтад Монгол Улсын эдийн засаг, нийгмийн өмнө тулгамдаж буй асуудлаар нэр хүндтэй манлайлагчдыг урин оролцуулж хөгжлийн бодлого, түүнийг хэрэгжүүлэх арга замыг хэлэлцүүлдэг.

Ч.Ганхуягийн санаачилгыг дэмжиж С.Батболдын Засгийн газраас 2010 оны хоёрдугаар сарын 8-9-нд Монголд анх удаа төрийн болон төрийн бус байгууллагууд, иргэний нийгмийн байгууллагууд, эрдэмтэн судлаачид, хувийн хэвшлийнхний дунд эдийн засгаа хэрхэн шинэчлэн хөгжүүлэх тухай нээлттэй хуралдаан зохион байгуулж гарцаа тодорхойлсон юм. Түүнээс хойш Монголын Эдийн Засгийн Чуулганыг жил бүр уламжлал болгон зохион байгуулж, улс орны өмнө тулгарч буй хөгжлийн асуудлаар тухай бүрт нь хэлэлцэн, холбогдох талуудын хооронд нэгдсэн ойлголцлыг бий болгосоор ирсэн билээ.      

Дэлхийн Залуу Манлайлагч хэмээх хүндтэй үүргийг хүлээгээд Ч.Ганхуяг Дэлхийн Эдийн Засгийн Чуулганыг Монголд таниулах чиглэлээр олон ажил зохион байгуулсны нэг нь Нэр Төрөө Эрхэмлэх Даян Дэлхийн Өдөр юм.

Нэр төрөө эрхэмлэх нь зөвхөн хувь хүний асуудал бус, хүрээлэн буй хүмүүс болон нийгмийн өмнө хүлээсэн ухамсарт хариуцлагын нэг хэлбэр юм. Энэ дэлхийн иргэд шашин шүтлэг, улс төр, арьс өнгө, үзэл баримтлалаараа өөр ч нэр төрөө эрхэмлэх тухайд хүн бүр санал нэгддэг. Иймд жил бүрийн 10 дугаар сарын 20-ныг "Нэр Төрөө Эрхэмлэх Даян Дэлхийн Өдөр" болгож тэмдэглэн өнгөрүүлдэг байна.

Норвегийн эрхэмсэг ханхүү Хаакон, “Hope” төслийн санаачлагч Жон Браянт, Хелсинкийн Урлаг дизайны их сургуулийн профессор, Оксфордын их сургуулийн зочин багш Пекка Ниманен нар “Нэр Төрөө Эрхэмлэх Даян Дэлхийн Хөдөлгөөн”-ийг анх үүсгэн санаачилжээ. Энэ нь нэр төртэй амьдрах нийтлэг эрх ашгийг даян дэлхийд түгээн дэлгэрүүлэх зорилго бүхий ашгийн бус, шүүмжлэгч бус, мөн аливаа улс төрийн хүчний харьяат бус бие даасан санаачилга хөдөлгөөн билээ. Дэлхий дахинаа өөрийн эрхэм нэр төр, тэрхүү нэр төрийг бий болгосон эрхэм үйл ажиллагаагаараа танигдсан энэ цаг үеийн манлайлагчид “Нэр Төрөө Эрхэмлэх Даян Дэлхийн Хөдөлгөөн”-д идэвхтэй нэгдэж байна.

Манай улсад энэхүү өдрийг 2009 оноос тэмдэглэж эхэлсэн бөгөөд Ч.Ганхуяг Монгол Улс дахь Даян Дэлхийн Нэр Төрөө Эрхэмлэх Хөдөлгөөний Тэргүүнээр ажиллаж байна. 

Дэлхийн Эдийн Засгийн Чуулган нь 40 хүрээгүй насны залуу улстөрч, нийгмийн зүтгэлтэн, бизнесмэнүүдийг дэлхийн том үйл явцад татан оролцуулах, тэдний дуу хоолойг дэлхийн удирдагчдад хүргэх зорилгоор 2004 онд Young Global Leader нийгэмлэгийг байгуулжээ.

ДЭЗЧ-наас жил бүр “Дэлхийн Залуу Манлайлагч”-ийг тодруулдаг. Уг шалгаруулалтад Давосын форумтай ямар нэгэн байдлаар холбоотой аль ч улсын иргэнийг нэр дэвшүүлж болдог аж. Бусад улс орны гишүүд нь шилдэг гэсэн хүмүүсийн нэрсийг дэвшүүлдэг бөгөөд шалгаруулалтыг Иорданы хаант улсын эрхэмсэг хатан хаан Рания Ал Абдуллагийн ахалсан баг ажиллаж тодруулдаг байв. Шалгуур нь тухайн хүн одоо юу хийчихсэн байгаад биш, ирээдүйд юу хийж бүтээж чадах вэ гэдэгт анхаарлаа хандуулдгаараа онцлогтой.

2009 онд тус номинацид нэр дэвшсэн дэлхийн өнцөг булан бүрийн 5000 гаруй залуусаас 230 нь шилдгээр шалгарсан бөгөөд тэдний нэг нь Ч.Ганхуяг байлаа. Тэрбээр ажил мэргэжлийн амжилт, улс нийгэмдээ болон дэлхий дахины ирээдүйн бүтээн байгуулалтад оруулах хувь нэмэр, удирдан манлайлах чадвараа үнэлүүлэн ийнхүү Монголоосоо анхлан дэлхийн шилдэг залуу удирдагчдын эгнээнд багтжээ.

Германд төрсөн Женевийн их сургуулийн профессор Клаус Шваб 1971 онд өнөөдрийн Дэлхийн Эдийн Засгийн Чуулганыг анхлан санаачилж, Европын Менежментийн Чуулган нэртэйгээр зохион байгуулжээ. Түүнээс хойш уг чуулганы цар хүрээ тэлсээр 1987 оноос “Дэлхийн” гэсэн тодотголтой болж, дэлхийн топ лидерүүд нэгэн дор хуран чуулдаг хамгийн чухал цугларалтуудын нэг болсон байна.

Ийнхүү жил бүрийн нэгдүгээр сард Швейцарын Давос тосгонд эдийн засгийн томоохон шийдвэр гаргах түвшний улс гүрнүүдийн удирдлагууд хуран цугларч, ямарваа нэг талын ашиг сонирхолд үйлчлэхгүйгээр, хүн төрөлхтний өмнө тулгарч буй хамгийн том асуудлуудыг хэрхэн хамтын оролцоотойгоор шийдвэрлэж болох талаар хэлэлцэж, гарцыг эрэлхийлэх болсон юм. 

Далайн түвшнээс дээш 2,800 метрт оршдог Давос тосгон нь 5,000 орчим хүн амтай. Тэнд Дэлхийн Эдийн Засгийн Чуулганы бэлтгэл ажилд жил бүр 10 мянган хүнийг дайчилдаг аж. Ердөө 4-5 өдөрт багтаан хэлэлцдэг энэ хурлын үеэр 400 гаруй хурал зөвлөгөөн, хэлэлцүүлэг явагддагаараа онцлогтой.

Монгол Улс Давосын чуулганд 1990-ээд оны эхэн үеэс албан ёсоор төрийн төлөөллөө оролцуулж эхэлжээ. Дунд нь хэсэг завсарлаад, 2005 оноос ахин тасралтгүй оролцох болсон байна.

Ч.Ганхуяг 2009 оноос Дэлхийн Эдийн Засгийн Чуулганы гишүүн болсноор уг хуралд жил бүр эх орноо төлөөлөн оролцож, дэлхий нийтийн хөгжлийн төлөөх үйлсэд хувь нэмрээ оруулан ажиллаж байна.

Ч.Ганхуягийн санаачилгаар Үндэсний Хөгжлийн Санхүүгийн Анхдугаар Чуулга Уулзалтыг Монголбанк, ХасБанк, Санхүүгийн Зохицуулах Хороо, НҮБ-ын Хөгжлийн Хөтөлбөр, МҮХАҮТ-аас 2008 оны гуравдугаар сард хамтран зохион байгуулсан юм. Чуулганы үеэр нийгмийн хариуцлага, байгаль орчин, хэрэглэгчийн эрх ашгийг хамгаалах, санхүүгийн ил тод байдал, засаглалын acyyдал, зээлийн мэдээллийн сан, дэд бүтэц зэрэг Монголд тулгамдаж, хөгжингүй орнуудад яригдах болсон олон асуудлыг ярилцсан юм. Үндэсний Хөгжлийн Санхүүгийн Анхдугаар Чуулга Уулзалт нь 2008 оны тавдугаар сард Монгол Улсад болох Олон Улсын Бичил Санхүүгийн Байгууллагуудын XI Чуулганы эхлэл, бэлтгэл ажил байлаа.

Польшид төвтэй Олон Улсын Бичил Санхүүгийн Төв нь Зүүн Европ, Төв Ази, Төв Европын 110 гаруй байгууллагыг эгнээндээ нэгтгэсэн томоохон байгууллага юм. Ч.Ганхуяг 2007 оноос Олон Улсын Бичил Санхүүгийн Төвийн Удирдах зөвлөлийн гишүүнээр ажиллаж эхэлсэн бөгөөд мөн онд Харвардын их сургууль дээр "Бичил санхүүгийн салбар дахь шинэчлэл" сэдвээр лекц уншсан анхны монгол хүн болжээ.

Тэрбээр цөөнгүй жил хөөцөлдөж байж Олон Улсын Бичил Санхүүгийн Төвөөс жил бүр уламжлал болгон зохион байгуулдаг Олон Улсын Бичил Санхүүгийн Байгууллагуудын Чуулга Уулзалтыг 2008 онд эх орондоо анхлан зохион байгуулах эрхийг олж авсан юм.

Ч.Ганхуяг 2007 онд Болгар Улсын нийслэл Софид болсон хурал дээр үг хэлж байхдаа Монгол Улсын Ерөнхийлөгчөөс албан ёсоор авсан зөвшөөрлийн дагуу “Монгол Улсын Ерөнхийлөгч та бүхнийг урилаа. Та бүхэн ирэх жил Монгол Улсад хуралдана уу” гэсэн хүсэлтээ тавьжээ. Хуралд оролцогсод маш сайхан хүлээж авсан ч “тендэр зарлана” гэсэн байна. 2008 оны хурлыг Азид хийхээр урьд нь ярилцчихсан байсан учраас тендэрт Монгол, Казакстан хоёр өрсөлджээ. Олон Улсын Бичил Санхүүгийн Төвийн гишүүдийн ихэнх нь Казакстан, Киргизстанд байсан ч, Монгол Улсын Ерөнхийлөгчийн урилга, санхүүгийн санал, ХасБанкны Олон улс дахь нэр хүнд, зохион байгуулалтын түвшин зэрэг хүчин зүйлс нөлөөлж, Монголд хуралдахаар болсон байна.

Ийнхүү Ч.Ганхуяг өөрийн санаачилгаар Ази, Европын бичил санхүүгийн 500 гаруй томоохон байгууллагын зочид төлөөлөгчдийг тусгай үүргийн нислэгээр эх орондоо авчирч, 2008 оны тавдугаар сарын 29-31-нд Төрийн ордны их танхимд Олон Улсын Бичил Санхүүгийн Байгууллагуудын XI Чуулга Уулзалтыг Монгол Улсын Ерөнхийлөгчийн ивээл дор өндөр түвшинд зохион байгуулсан юм. Хурлын үеэр бичил санхүүгийн чиглэлээр ажилладаг томоохон эрдэмтэд, шинжээчид, дэлхийн нэр хүндтэй банкирууд, бизнесмэнүүд, хөрөнгө оруулагчид тус салбарт тулгамдаж буй асуудлаар санал бодлоо солилцож, халуун мэтгэлцээн өрнүүлж, бие биеийнхээ тэргүүн туршлагаас судалсан.

Энэ нь бичил санхүүгийн байгууллагуудын Азид болсон хамгийн том чуулган бөгөөд Монголоо сурталчилсан асар том хөрөнгө оруулалт байлаа. Учир нь, гадны 500 банкир Улаанбаатарт ирээд гурав хонохдоо зөвхөн ХасБанкны бичил санхүүгийн үйл ажиллагаатай танилцаад зогсохгүй, Монголын ёс уламжлал, соёл урлаг, Улаанбаатар хот, Монгол Улсад оруулах хөрөнгө оруулалтын боломжуудтай танилцсан билээ.