2007 онд Ч.Ганхуяг, Петровис группийн үүсгэн байгуулагч Ж.Оюунгэрэл, Эм-Си-Эс группийн үүсгэн байгуулагч Ж.Оджаргал, МҮХАҮТ-ын Ерөнхийлөгч С.Дэмбэрэл нарын санаачилгаар үндэсний шилдэг компани, корпорациудын Гүйцэтгэх захирлууд нэгдэж, шинэ үеийн шилдэг захирлуудыг бэлтгэн гаргах зорилго бүхий CEO Клубыг үүсгэн байгуулжээ. Тус Клуб Монголын хувийн хэвшлийнхний санал санаачилга, дуу хоолойг олон нийт болон төр засгийн байгууллагад хүргэх, бизнесийн хөгжлийг дэмжих бодлогыг хууль тогтоомж, төрийн бодлого, чиглэлд тусгуулах, нийгэм, олон нийтийн дэмжлэгийг авахад чиглэн ажилладаг. Монголын Гүйцэтгэх захирлуудын клуб 13 дахь жилдээ үйл ажиллагаа явуулж байгаа бөгөөд үндэсний шилдэг 20 орчим компани, корпорацийг эгнээндээ нэгтгээд байна.

CEO клубын үүсгэн байгуулагч Ч.Ганхуяг 2007 – 2008 онд анхны Ерөнхийлөгчөөр, мөн 2016 – 2018 онд дахин Ерөнхийлөгчөөр сонгогдож ажилласан юм. Тэрбээр, Тэнгэр Санхүүгийн Нэгдлийн Гүйцэтгэх захирал байхдаа Монголын шилдэг CEO-гоор өргөмжлөгдөж байв.

2006 оны 10 дугаар сарын 6-нд Монголбанк болон арилжааны 10 банк (Анод банк, Голомт банк, Капитал банк, Капитрон банк, Монгол шуудан банк, Хаан банк, ХасБанк, Худалдаа Хөгжлийн банк, Зоос банк, Улаанбаатар хотын банк) хамтран Ипотекийн анхдагч болон хоёрдогч зах зээлийн үйл ажиллагааг хөгжүүлэн дэмжих зорилгоор компани үүсгэн байгуулах хурал хийж, Монголын Ипотекийн Корпорацийг үүсгэн байгуулж, Гүйцэтгэх захирлын үүрэг гүйцэтгэгчээр Эдийн засгийн бодлогын шинэтгэл, өрсөлдөх чадвар төслийн зөвлөх Д.Ашидмааг томилжээ. Тухайн үед ХасБанкны Гүйцэтгэх захирлаар ажиллаж байсан Ч.Ганхуяг Монголын Ипотекийн Корпораци (МИК)-ийн ТУЗ-ийн анхны даргаар сонгогдож 2008 он хүртэл ажилласан юм.  

Өнөөдөр тус компани нь хөрөнгөөр баталгаажсан үнэт цаас гарган дотоод, гадаадын хөрөнгийн зах зээл дээр борлуулах замаар ипотекийн анхдагч болон хоёрдогч зах зээлийг хөгжүүлж, Монгол Улсын хүн амыг орон сууцаар хангах, цаашид орчин үеийн хот байгуулалтыг эрчимжүүлэхэд чиглэсэн урт хугацаат санхүүжилтийн тогтолцоог бий болгож төлөвшүүлэхээр зорин ажиллаж байна.

Ч.Ганхуяг 2006 онд Их Талын Дуулиан ТББ-ыг санаачлан, хэсэг нөхдийнхөө хамт үүсгэн байгуулж, Монголд хөлбөмбөгийн спортыг хөгжүүлэх, багийн спортоор дамжуулан хүүхэд залуусыг зөв хүмүүжүүлж төлөвшүүлэх, түүнчлэн 2020 он гэхэд Монгол Улсынхаа хөлбөмбөгийн шигшээ багийг ДАШТ-нд оролцуулах том зорилго тавиад “Дуулиан – 2020” хөдөлгөөнийг эхлүүлсэн юм. Их Талын Дуулиан ТББ-аас Монгол Улсын Ерөнхийлөгчийн ивээл дор “Дуулиан - 2020” хүүхдийн хөлбөмбөгийн тэмцээнийг 2006 оноос жил бүр зохион байгуулж, ивээн тэтгэж, ерөнхий боловсролын сургуулиуд ч үүнд идэвхтэй оролцох болжээ.

Үүнээс гадна, Ч.Ганхуяг болон түүний найз нар ТВ5 телевизтэй хамтран ажиллаж, 2006 оны хөлбөмбөгийн ДАШТ-ийг Монголд шууд дамжуулсан юм.

Монгол Улсад багийн спортыг хөгжүүлэх зорилгоор сагсан бөмбөгийн “Хасын Хүлэгүүд” багийг анх 2004 онд ХасБанкны Гүйцэтгэх Захирал Ч.Ганхуяг хэсэг нөхдийнхөө хамтаар үүсгэн байгуулж байв. Түүнээс хойш “Хасын Хүлэгүүд” баг тогтмол амжилт гаргаж, Европын орнуудаар аялан тоглолт хийж, Белги, Франц, Голландын хоёрдугаар лигийн багуудтай талбайд гарч, бүх тоглолтдоо ялалт байгуулж байсан юм.

 “Хасын Хүлэгүүд” баг 2012 оноос клубын зохион байгуулалтад орж, түүнээс хойш долоо дахь удаагаа, сүүлийн таван жил дараалан лигийн аваргын төлөө шалгарч байна. Лигийн аваргаар “Хасын Хүлэгүүд” баг зургаан удаа тодроод байна.

ХасБанк нь Монгол Улсын банк санхүүгийн зах зээлд олон шинэлэг бүтээгдэхүүн үйлчилгээ нэвтрүүлсний нэг нь Ирээдүйн саятан хадгаламж юм. Хүүхэд багачуудад мөнгөний үнэ цэн, хуримтлал, хадгаламжийн ач холбогдлыг ойлгуулан таниулах, ирээдүйдээ бэлтгэх хүмүүжлийг олгох зорилготой энэхүү хадгаламж нь 2003 оны Хүүхдийн эрхийг хамгаалах өдөр буюу хүүхдийн баяраар анх мэндэлжээ. 0-16 насны хүүхдэдээ зориулан урт хугацаанд хуримтлал үүсгэн ирээдүйг нь баталгаажуулахыг хүсч буй эцэг эхчүүд уг бүтээгдэхүүнийг алга ташин хүлээж авсан юм. Учир нь, Ч.Ганхуягийн санаачилсан Ирээдүйн саятан хадгаламжийн бүтээгдэхүүнийг нэвтрэх хүртэл Монголд хүүхдийн хадгаламж гэдэг ойлголт байгаагүй гэхэд болно. Ирээдүйн саятан хадгаламж 2004 онд МҮХАҮТ-ын Yндэсний брэнд бүтээгдэхүүнээр анхлан шалгарсан юм.

Ч.Ганхуяг 0-18 хүртэлх насны иргэдэд зориулсан, урт хугацаатай, хүүгээс хүү бодогддог өндөр хүүтэй Хасхүү хадгаламжийн бүтээгдэхүүнийг мөн санаачлан нэвтрүүлжээ. Тус хадгаламжийг нээх мөнгөний доод хэмжээ нь бусад арилжааны банкуудын хүүхдийн хадгаламжтай харьцуулахад хамгийн бага буюу 3000 төгрөг байгаа нь хүүхдийнхээ ирээдүйд зориулан хуримтлал бий болгохыг хүссэн хэн бүхэнд боломжийг олгосоор ирсэн юм.

Нийгмийн даатгал, эрүүл мэндийн даатгалаа төлдөггүй, хувиараа хөдөлмөр эрхэлж яваа иргэдийн эрүүл мэнд, ирээдүйн тэтгэвэрт сэтгэл зовнихдоо тэрбээр Насны нүнжиг урт хугацаат хадгаламжийн бүтээгдэхүүнийг 2004 онд мөн санаачилсан билээ. Таван жилийн хугацаатай Насны нүнжиг хадгаламж нь өнөөдөр иргэдийн дунд эрчимтэй яригдаж, нийгмийн хэрэгцээ шаардлага болоод буй хувийн тэтгэврийн анхны бүтээгдэхүүн, олон жилийн өмнөх анхны санаачилга болсноороо онцлогтой.

2003 онд ХасБанкны 230 ажилтан нэгдэж нийгэмд тустай үйл бүтээх, байгаль дэлхийгээ хамгаалах, ирээдүй хойч үедээ туслах зорилгоор Хөгжлийн Алтан Сан Холбоо ТББ-ыг байгуулсан юм.

Тус холбооноос “Гурван голоо цэвэрлэхэд 300 саяыг зориулъя”, “Та дэмж бид цэвэрлэе” кампанит ажлууд, хүүхэд залуусыг хамарсан спортын уралдаан тэмцээн, асрамжийн цэцэрлэг сургуульд хандив өргөх, түүнчлэн Улаан Загалмайн Нийгэмлэгтэй хамтарч дайнд нэрвэгдсэн Сирийн ядарсан хүүхдүүдэд бэлэг, хандив цуглуулах зэрэг нийгэмд тустай, хүмүүнлэгийн олон ажлыг санаачлан зохион байгуулжээ.

Тухайлбал, 2004 онд АНУ-ын Мерси Кор ТББ-тай хамтран Туул, Сэлбэ, Дунд голын эрэг орчмын газрыг хог хаягдлаас цэвэрлэх “Гурван голоо цэвэрлэхэд 300 сая төгрөг зарцуулъя” аянг зохион байгуулснаар гол усны бохирдлын асуудлыг олон нийтийн анхааралд хүргэж, үүнээс хойш олон компани нийгмийн хариуцлагын хүрээнд байгаль орчноо цэвэр байлгахад чиглэж ажиллах болсон юм.

Ч.Ганхуяг өөрийн биеэр үлгэрлэн оролцож, гурван жил дараалан гурван голынхоо сав газрыг цэвэрлэхийг уриалж, иргэдтэйгээ хамт хог түүж, ачуулсан энэхүү кампанит ажилд 1,000 орчим иргэн сайн дураараа оролцжээ. Сонирхуулахад, энэхүү аянд зориулж тэрбээр гурван чингэлэг NIKE брэндийн пүүз оруулж ирсэн бөгөөд есөн шуудай хог түүсэн хүнд нэг пүүз бэлэглэхэд иргэд машид урамшин байгаль орчноо богино хугацаанд цэмцийлгэсэн юм.

Х.А.С. (Хөгжлийн Алтан Сан) Холбоо Төрийн Бус Байгууллага нь 2003 онд ХасБанкны Гүйцэтгэх захирал Ч.Ганхуягийн санаачилгаар ХасБанкны ажиллагсдын сайн дурын оролцоотойгоор үүсгэн байгуулагдсан. Холбоо нь хүүхдийг, нэн ялангуяа ядуу болон бага орлоготой өрхийн хүүхдийг, нэр төртэй, өв тэгш хүмүүжих боломжоор хангах, эрүүл, аюулгүй орчинд амьдрах, чанартай боловсрол эзэмших нөхцөлийг бүрдүүлэх эрхэм зорилгын хүрээнд үйл ажиллагаагаа явуулдаг. Холбооны гишүүд (2007 оны байдлаар 631 гишүүн) нь авьяаслаг өнчин, ядуу болон орлого багатай өрхийн хүүхдүүд, хөгжлийн бэрхшээлтэй, хүнд өвчтэй, эмчилгээ хийлгэх шаардлагатай хүүхдүүдэд тусламжийн гар сунгах, хүүхэд залуучуудын дунд спорт, урлагийн тэмцээн зохион байгуулах, мөн байгаль орчноо хамгаалах, нөхөн сэргээх зэрэг үйл ажиллагааг санхүүжүүлэхэд сарын цалингийнхаа 1 хувийг сайн дурын үндсэн дээр хандивладаг ажээ.